پاداشت

بەڕێوبەرایەتی خزمەرگوزاریی..

- بەیانیت باش گەورەم..

+ بەیانیت باش، فەرمو دانیشە. کاک کەنعان داوات کردووە ١٢ ساڵی پێشمەرگایەتی و خەباتت بۆ بکرێت بە خزمەت و لەسەر میلاکی حکومەتی ھەرێم تۆماربکرێت..

- بەڵێ ڕاستە قوربان.

+ مافی ڕەوای خۆتە و ئێمە لەخزمەتی ئێوەداین، ئەم کەشەی ئێستا ئێوە ڕەخسانتان بۆ ئێمە. وا من ئیمزای دەکەم بیبە بۆ ژووری ئەمدیو تا کارەکانی تری بۆ بکەن.

- دەستخۆش، ئەی بۆ مەسەلەی زەوییەکە...

+ ئەوە پەیوەندی بە ئێمەوە نییە، بڕۆ بۆ بەڕێوبەرایەتی زەوی و زار..

بەڕێوبەرایەتی زەوی و زار..

+ فەرموو کاک کەنعان دانیشە.

باجی.. باجی دوو چای جوانمان بۆ بھێنە. داوای پارچە زەوییەکت کردووە، و شتەکانیشت بەڕێکوپێکی پڕ کردۆتەوە..

- بەڵێ.

+ لەبیرت ماوە کەی پەیوەندیت کرد بە ڕیزی پێشمەرگەوە؟

- بەڵێ قوربان، ھەموویم نوسیووە.

+ ئێستا لە کوێ دەژیت و چەند سەر خێزانن..

- لەگەڵ ماڵی باوکما دەژین و چوار سەرخێزانین، دوو کچم ھەیە.

+ کاکە کەنعان، ئێمە لە سێ شوێن زەوی دابەش دەکەین، تۆ بڕیارت داوە لە کویا خانوو بکەیت؟

- بەڵێ، لەوانەی شەھیدان زۆر چاکە، نزیک ماڵی باوکمە..

+ زۆر باشە، وا من ئیمزام کرد. لای کاک کەمال نەخشەی زەوییەکان ھەیە بڕۆ تەماشای بکە و با دانەیەکت بۆ دیاری بکات و ھەر ئەو ڕێ و ڕەسمی تاپۆ و شتەکانی ترت پیشان ئەدات..

- دەست خۆش زۆر مەمنونم.

+ ئەو پرسیارانە ڕۆتینی بوون، بۆ معامەلەکانت پێویست بوون، ئەگینا نامەکەی کاک شێخ کفایەت بوو، سڵاوی منی پێ بگەیەنە.

- زۆر مەمنون، ئەی وەک بزانی بۆ مەسەلەی خوێندن ؟

+ ئەوە باشترە لە پەروەردە پرس بکەی، من ھیچ نازانم...

بەڕێوبەرایەتی پەروەردە و خوێندنی باڵا ...

+ کاک کەنعان بەڕێزت نیازی تەواوکردنی خوێندنتە؟

- بەڵێ، گەر بۆم بکرێ زۆرم حەز لێیە..

+ پێش پەیوەندی کردنت بە شۆڕشەوە تا پۆلی چەندت تەواو کردبوو؟

- پێنجی ئامادەییم تەواو کردبوو.

+ کەواتە ئەبێت شەشی ئامادەیی تەواو بکەی و بڕوانامەی بەکەلۆریت ھەبێت ئینجا

- ئەی ناکرێت بێ ئەوە، خۆ من بەتەمای کۆلیجی یاساکەم...کاکە شێخ بۆی نوسیویت..

+ نا ناکرێت، ئەبوو لە معامەلەکانتدا بتنوسیبا کە شەشت تەواو کردووە، و شەھادەکەت فەوتاوە. ئەوسا قسەی کاکە شێخیش لەسەر سەرم بوو.

- کەواتە ئەمە بدڕێنم و سەرلەنوێ...

+ بەڵێ، ھەر بیھێنەرەوە لای خۆم، ھەموویت بۆ تەواو دەکەم.

- زۆر مەمنونم، ئەی پرسیارێک، پاش ڕاپەڕین من دوو ساڵ دەرسم وتۆتەوە لە پێنجوێن، و مامۆستابووم، ئێستا ناتوانم لەشار ببمەوە بەمامۆستا؟

+ داوای لێبوردن دەکەم، ئەوەیان نازانم، بڕۆ بۆ پرسگە کاک مستەفای لێیە ئەو وەڵامی لایە..

ووردە ووردە کەنعان دامەزرایەوە، توانی ژیانی ئاسایی خۆی بگوزەرێ، و لەسەر "بودجەی حکومەتی ھەرێم" مەسرەفی خوێندنی بۆ کرا، دەستی کاکە شێخیش خۆشبێت، نامە و پاڵپشتییەکانی مافی خەباتگێڕێکی وەرگرت.