Sunday, December 26, 2010

کەڵەشێر

کەڵەشێرە هارەکە و ئازادی
دەگێڕنەوە پیاوێک کەڵەشێرێکی دەبێت، ئەم کەڵەشێرە لەگەڵ گزنگی بەیاندا دەست دەکات بە (قوقاندن) و دەچێتە سەر دیواری ئەم ماڵ و ئەو ماڵ و دەقوقێنێت. دراوسێیەک زۆر بێزار دەبێت و دەچێت بۆ لای کابرای خاوەن کەڵەشێر، داوای لێدەکات کە کەڵەشێرەکەی سەرببڕێت و بەرامبەر بەو کارەی سێ هێندەی نرخی کەڵەشێرەکەش پارەی ئەداتێ، بە خاوەن کەڵەشێریش دەڵێت گۆشتەکەی حەڵاڵی خۆت بێت و نۆشی بکەن. کابرای خاوەن کەڵەشێر بە پێشنیاری دراوسێکەی قایل دەبێت و هەر لەبەر چاویا چەقۆ بە ملی کەڵەشێرە هارەکەدا دەهێنێت.

سبەی بەیانی، لەبری کەڵەشێرێک دە کەڵەشێر دەقوقێنن!، کابرای دراوسێ بە هەڵەداوان خۆی دەگەیەنێتە لای خاوەن کەڵەشێری دراوسێی و پێی دەڵێت: "ئەوە من سێ ئەوەندەی نرخەکەی خۆی پارەم دایتێ تاکو ئەم هەرایەمان لە کۆڵ بێتەوە ئەوە چییە؟"، کابرای خاوەن کەڵەشێر دەڵێت: "بەڕێزم ئەم کەڵەشێرانە لە ترسی ئەوی تر نتقیان بڕا بوو، ئێستا ئەو نەماوە و ئازادن و ئەقوقێنن، خۆ ئیشەڵڵا هەموویان لەبەر خاتری تۆ سەر نابڕم؟!".

* ئەم چیرۆکەم لە لێدوانێکی کابرایەکی عەرەبەوە وەرگرتووە، بەراوردی کردبوو بە بارودۆخی ئێستای ئێراق و سەردەمی سەدام. سەدامیش هەر خۆی بوو، کە لابرا دەی تر دروست بوون لە شوێنی.
Post a Comment