باوکم زۆر جەختی لەوە دەکردەوە کە بەکارهێنانی ژیریی دەستکرد بۆ ئامادەکارییەکانی ڕۆژانە سنووردار بێت، و تەنها بۆ بەراوردکردنی چارەسەرەکان و دەستنیشانکردنی وەڵامە هەڵەکانم بەکاری بهێنم.
پێم گوت: "باوکی زەهرای هاوپۆلم، ژیریی دەستکردی بۆ دابین کردووە و ڕێگەی پێ دەدات سوودی لێ وەربگرێت؛ تۆ هەمیشە دەڵێیت بەکارهێنانی کۆمپیوتەر کات و وزەمان بۆ دەگەڕێنێتەوە، ئەی ڕێگریت چییە بۆ ژیریی دەستکرد؟"
باوکم: "تۆ لە تەمەنی فێربوون و ڕاهێناندایت. ئەگەر پشت بە ئامێرەکە ببەستیت بۆ ئەوەی وەڵامەکانت بۆ بداتەوە و بۆت ڕوون بکاتەوە، فێری بیرکردنەوە و شیکردنەوەی سەربەخۆ نابیت. ئەوەی ئێستا بۆ تۆ گرنگە تەنها تەواوکردنی ئەرکەکانت نییە، بەڵکو قوتابخانە داوات لێ دەکات فێر بیت تا ئامادە بیت بۆ وەڵامدانەوەی هەر پرسیارێکی تر کە پەیوەندی بە بابەتەکەتەوە هەبێت. بڕوانە، تەنانەت ژیریی دەستکردیش پێویستی بە ڕاهێنان و کاتی پێویست هەیە تاوەکو لەو دراوانەی (داتایانەی) ئێمە بۆی دابین دەکەین فێر ببێت، لەبەرئەوە ناونراوە 'گۆڕەری بەرهەمهێنەری پێشوەختە ڕاهێنراو' (بە کورتی جی.پی.تی). ئامێرەکان بێ دراوە (داتا) هیچ سوودێکیان نییە. بە هەرحاڵ کچەکەم، من لاریم نییە لەوەی لە بوارەکانی تردا بەکاری بهێنت بۆ ئەوەی لە دەوروبەرت تێبگەیت."
من: "تێگەیشتم بابە.."
باوکم: "ئایا لەبیرتە کاتێک پرسیت: بۆچی بەچکە زەڕافە دەتوانێت کەمتر لە کاتژمێرێک دوای لەدایکبوونی بڕوات، بەڵام مرۆڤ پێویستی بە چەندین مانگ یان تەنانەت ساڵێکیش هەیە؟ کچم ئێمە کاتمان هەیە بۆ فێربوون و گەشەکردن، بۆ ئەوەی یارمەتی مێشکمان بدەین بە باشی گەشە بکات، دەبێت بیر بکەینەوە. دەزانیت ئێمە کارامەیی ڕۆیشتن لە ڕێگەی 'تاقیکردنەوە و هەڵە' بەدەست دەهێنین؟ ژیریی دەستکردیش بە هەمان شێوە کار دەکات."
من: (بە هێمای تێگەیشتنەوە) "ئۆی، مەبەستت ئەوەیە باوکە کە هەر هەڵەیەک لە کاتی چارەسەرکردنی ڕاهێنانەکاندا دەیکەم، وەک 'داتای ڕاهێنان' وایە بۆم، و هەر هەوڵێکی بێئاکام وەک 'تاقیکردنەوەیەکە' کە مێشکم لێیەوە فێر دەبێت بۆ ئەوەی جارێکی تر بەهێزتر بێت، ڕێک وەک چۆن فێری ڕۆیشتن بووم!"
باوکم: (بە هێمنی زەردەخەنەی کرد) "ڕێک وایە. تۆ ژیریی دەستکرد بۆ ئەوە بەکار ناهێنیت کە لە هەڵە 'دوور بکەویتەوە'، بەڵکو بۆ ئەوەی لە هەڵەکە 'تێبگەیت'. کاتێک بۆ بەراوردکردنی وەڵامەکانت بەکاری دەهێنیت، تۆ خۆت ڕادەهێنیت کە خاڵە لاوازەکانی ناو بیرکردنەوەت بە خێراییەکی زیاتر بدۆزیتەوە."
من: "باشە، شێوازی بەکارهێنانی دەگۆڕم. سەرەتا خۆم هەموو ئەرکەکانم تەواو دەکەم، پاشان تەنها وەک 'ڕاهێنەرێکی پێشکەوتوو' بەکاری دەهێنم کە ئاماژە بەو خاڵانە بکات کە پێویستە لە کاتی پێداچوونەوەدا جەختیان لەسەر بکەمەوە."
لەو ساتەدا، هەستم کرد کە بەکارهێنانی تەکنەلۆژیا بۆ من ڕوونتر و ئامانجی ئاشکراتر بوو. ئیتر ژیریی دەستکرد تەنها ئامرازێک نەبوو بۆ جێبەجێکردنی ئەرکەکان، بەڵکو بوو بە "تەرازوویەک" کە جۆرێتیی بیرکردنەوەی خۆمی پێ دەپێوم. کۆمپیوتەرەکەم داخست و دەفتەرەکەم هەڵگرت، دەستم کرد بە چارەسەرکردنی پرسە ئاڵۆزەکان، لە کاتێکدا دەمزانی هەر هەنگاوێک دەینێم بەشێکی سەرەکییە لە بونیادنانی "مۆدێلی ژیریی تایبەت بە خۆم".
تێگەیشتم کە جیاوازی نێوان من و زەهرا لەوەدا نییە کێ ئامرازەکە بەکار دەهێنێت، بەڵکو لە شێوازی بەکارهێنانی دایە.
چیرۆکێکی کورت - ئاراس نوری
٢١ی ئابی ٢٠٢٥
