نەورۆز

نەورۆزتان پیرۆز

ساڵی نوێی کوردی ٢٧١١ لە هەموو کوردێک پیرۆز بێت!

ئەم ڕۆژی ساڵی تازەیە نەورۆز ھاتەوە 

جەژنێکی کۆنی کوردە بە خۆشی و بە ھاتەوە

چەند ساڵ گوڵی ھیوای ئێمە پێ‌پەست بوو تاکو پار
ھەر خوێنی لاوەکان بوو گوڵی ئاڵی نەوبەھار

ئەو ڕەنگە سوورە بوو کە لە ئاسۆی بڵندی کورد
مژدەی بەیانی بۆ گەلی دوور و نزیک ئەبرد

نەورۆز بوو ئاگرێکی وەھای خستە جەرگەوە 
لاوان بە عەشق ئەچوون بە بەرەو پیری مەرگەوە

ئەوا ڕۆژھەڵات، لە بەندەنی بەرزی وڵاتەوە 
خوێنی شەھیدە ڕەنگی شەفەق شەوق ئەداتەوە

تا ئێستە ڕووی نەداوە لە تاریخی میللەتا 
قەڵغانی گولـلە سنگی کچان بێ لە ھەڵمەتا

پێی ناوێ بۆ شەھیدی وەتەن شیوەن و گرین 
نامرن ئەوانە وا لە دڵی میللەتا ئەژین

پیرەمێرد - ئازاری ١٩٤٨

وێنە لە لایەن ئارا قادر

دەوڵەمەندی و بەخشندەیی

دەگێڕنەوە دەڵێن کوڕێک دێتە لای موسای پێغەمبەر (هەزار سڵاو لە گیانی) داوای لێدەکات کە خوا دەوڵەمەندی بکات و بۆی بپاڕێتەوە...
موسا لێی دەپرسێت دەتەوێت خوا دەوڵەمەندت بکات، لە یەکەم سی ساڵی تەمەنت؟ یان لە سی ساڵی کۆتایی تەمەنتدا؟
کوڕە کەوتە بیر کردنەوە و بەراوردکردن، سەرەنجام بڕیاری بۆ سی ساڵی یەکەمی تەمەنی دا، وتی من بە بە گەنجێتی پارەم دەوێت و ئارەزووم هەیە بە گەنجێتی خۆش بگوزەرێم، جگە لەوە بەس خوا دەزانێت کە چەند دەژیم و کێ ناڵێ بە ٣٠ ساڵی نامرم، بیری چۆوە کە مرۆڤ بە پیری لاواز دەبێت و پێداویستییەکانی زیاترن. موساش لە خوا پاڕایەوە، خواش وەڵامی پاڕانەوەکەی دایەوە کە یەکەم ٣٠ ساڵی تەمەنی دەوڵەمەندی دەکات.
کوڕە خوا ڕزق و ڕۆزی بۆ نارد و ڕۆژ لە دوای ڕۆژ پایەدارتر دەبوو. گەورەبوو بوو بە گەنجێکی ساماندار، هەمیشە هاوکاریی ماڵی خەڵکی دەکرد، پارەی ئەدا بە نەداران، دەستی یارمەتی بۆ هەموو کەس درێژ دەکرد، ژنی دەخواست بۆ بێ باوکان، خانووی دەکرد بۆ بێ لانەکان...
سی ساڵ تێپەڕی و نۆرەی ٣٠ ساڵی دووەمی ژیانی هات... موسا چاودێری ڕووداوەکانی دەکرد، بارودۆخی کوڕە کە بووە بە پیاوێکی دەوڵەمەند وەکو خۆی ماوەتەوە و بگرە زیادی کردوە و بەردەوامیش زیاد دەبێت...
موسا ڕووی کردە خوا و پرسی: "خوایە گیان ٣٠ ساڵی یەکەم تەواو..."
خواش وەڵامی دایەوە: "بەندەی خۆمم بینی کە دەرگای بەخشینەوە و یارمەتی بۆ هەموو کەس کراوە بوو، ئیتر شەرمم کرد، چۆن ڕزقی لێ ببڕم و دەرگای لێداخەم!."

دەسا ئێمەیش تا هەبووین، تا لە تواناماندا هەیە، با دڵفراوان و بەخشندەبین، با دەرگای خێر و چاکەکاری لە هەژار و نەدار دانەخەین. کەسانی وەکوو بەخشندە (کەریمی عەلەکە) و چەندینی تر بهێنینەوە بەرچاومان و دوای ڕێوشوێنیان بکەوین.

كرده‌وه‌ی خۆشه‌ویستان

 ده‌گێڕنه‌وه‌ ئه‌ڵێن دوو هاوڕێ پێكه‌وه‌ پیاسه‌یه‌ك ده‌كه‌ن به‌ بیابیاندا، له‌ڕێگا مشت و مڕیان ده‌بێت له‌سه‌ر بیروبۆچوونی جیا، یه‌كێكیان توڕه‌ ده‌بێت و زللـه‌یه‌ك
ئه‌دات له‌وی تر.زللـه‌ لێدراوه‌كه‌، ئازاری زلـله‌كه‌ له‌ دڵیا ده‌هێڵێته‌وه‌ و، له‌سه‌ر خۆڵی بیابانه‌كه‌ به‌ داره‌كه‌ی ده‌نووسێت:"ئه‌مڕۆ خۆشه‌ویسترین هاوڕێم، زلـله‌یه‌كی لێدام ".دوو هاورێ كه‌ به‌رده‌وام ده‌بن له‌سه‌ر ڕۆیشتن، تاكو ده‌گه‌نه‌ مێرگێك، بڕیار ئه‌ده‌ن كه‌ گه‌یشتن مه‌له‌ی تیا بكه‌ن و خۆیان فێنك بكه‌نه‌وه‌.له‌ناكاو زللـه‌ لێدراوه‌كه‌ قاچی له‌ خۆڵه‌دا ده‌چه‌قێ (خۆڵه‌ جوڵاوی بیابان) به‌ناوا و له‌ جووڵه‌ ده‌وه‌ستێك، هاوڕێیه‌كه‌ی به‌هانایه‌وه‌ دێت، ده‌ستی ڕاده‌كێشێت و ڕزگاری ده‌كات له‌ خنكان له‌ناو خۆڵه‌كه‌دا. پاش ڕزگاربوونی له‌ مردن، له‌سه‌ر به‌ردێكی قه‌راغ مێرگه‌كه‌ ده‌نووسێت:"ئه‌مڕۆ خۆشه‌ویسترین هاوڕێم، له‌ مردن ڕزگاری كردم ".

به‌دبه‌ختی

به‌دبه‌ختی چییە؟

 ئه‌كرێ بڵێین كه‌ به‌دبه‌ختیی گرێیه‌كی ده‌روونی ئاڵۆسكاو و شیته‌‌ڵ نه‌كراوه‌ له‌مێشكدا، ده‌بینین زۆركات به‌دبه‌خت ئه‌و كه‌سانه‌ن كه‌ له‌خه‌یاڵپڵاو و چاوه‌ڕوانیی ئاكامی كاره‌كانیاندا بۆ سه‌رنه‌كه‌وتن و كه‌وتن ده‌ڕوانن.. سه‌رنج ئه‌ده‌ین به‌ڕواڵه‌ت زۆر سوورن له‌سه‌ر سه‌ركه‌وتن و گه‌یشتن به‌ئامانج و به‌و نیازه‌ش ڕێ ده‌گرن، به‌ڵام له‌ناخیاندا چاوه‌ڕێی كه‌وتن و دۆڕانن.. كه‌واته‌ وه‌ك ئه‌و كه‌سانه‌ن كه‌له‌سه‌ر په‌تێك هه‌نگاو ئه‌نێن و هه‌میشه‌ ترس له‌دڵن و چاوه‌ڕێی كه‌وتنه‌خواره‌وه‌ ده‌كه‌ن.

چیرۆک

له‌م ڕۆژانه‌دا كه‌ناڵێكی كوردی، له به‌رنامه‌ی مناڵاندا، كۆمه‌ڵێك منداڵی باخچه‌ی ساوایانی هێنا بوو، یه‌كێكیان ئه‌م چیرۆكه‌ی گێڕایه‌وه:

" ڕۆژێك مناڵێك داوا له باوكی ده‌كات بۆیه‌ی بۆ بكڕێت، باوكی كه ده‌چێت بۆ بازار له بیری ده‌چێت، ئێواره منداڵه‌كه‌ توڕه ئه‌بێت، باوكی ئه‌ڵێ به‌یانی بۆت ئه‌كڕم، ئیتر به‌یانییه‌كه‌ی تر باوكی بۆی ده‌كڕێت".

وانەی ڕیفراندۆم

چاودێری پۆل:  هەستن..

مامۆستا خۆی دەکات بە پۆل دا و..

مامۆستا: ڕۆژتان باش فەرموو دانیشن. 

لەسەر سوچی لای ڕاستی تەختەڕەشدا دەنوسێ وانەی/3 و لەناوەڕاستیشدا بە گەورەیی دەنوسێ «ڕیفراندۆم».